ഇസ്രായേല്‍-ഹമാസ് സംഘര്‍ഷം പ്രാദേശിക യുദ്ധത്തിലേക്ക് നീങ്ങുന്നത് തടയണമെന്നു ബൈഡന്‍
പി പി ചെറിയാന്‍
വാഷിംഗ്ടണ്‍ ഡി.സി: ഇസ്രായേല്‍-ഹമാസ് സംഘര്‍ഷം പ്രാദേശിക യുദ്ധത്തിലേക്ക് നീങ്ങുന്നത് തടയാനും സിവിലിയന്‍മാര്‍ക്ക് പൂര്‍ണ സംരക്ഷണം ഉറപ്പാക്കുന്നതിനുള്ള ശ്രമങ്ങള്‍ക്ക് യു എസ് പിന്തുണ നല്‍കുമെന്നും പ്രസിഡന്റ് ജോ ബൈഡന്‍ .
ഗാസയില്‍ താമസിക്കുന്ന ഭൂരിഭാഗം ആളുകളും നിരപരാധികളായ ഫലസ്തീന്‍ കുടുംബങ്ങളാണെന്നും ഹമാസുമായി യാതൊരു ബന്ധവുമില്ലെന്നും ബൈഡന്‍ പറഞ്ഞു.
കഴിഞ്ഞയാഴ്ച ഹമാസിന്റെ ആക്രമണത്തിന് ശേഷം പലസ്തീന്‍ അതോറിറ്റി പ്രസിഡന്റ് മഹ്‌മൂദ് അബ്ബാസുമായി ബൈഡന്‍ ആദ്യമായി ഫോണില്‍ ബന്ധപെട്ടാണ് ഗാസയിലെ മാനുഷിക ശ്രമങ്ങള്‍ക്ക് അദ്ദേഹത്തിന്റെ പൂര്‍ണ്ണ പിന്തുണ വാഗ്ദാനം ചെയ്തത് . അതേസമയം ഗാസയിലേക്ക് മാനുഷിക സഹായമെത്തിക്കാനുള്ള സുരക്ഷിതമായ വഴി ഉടന്‍ തുറക്കണമെന്ന് അബ്ബാസ് ബൈഡനോട് ആവശ്യപ്പെട്ടു. മെഡിക്കല്‍ ഉപകരണങ്ങളും വെള്ളവും വൈദ്യുതിയും എണ്ണയും ഗാസയിലേക്ക് വിതരണം ചെയ്യണം. പാലസ്തീനികള്‍ ഗാസ മുനമ്പില്‍ നിന്ന് കുടിയൊഴിഞ്ഞ് പോകില്ലെന്നും അദ്ദേഹം ബൈഡനെ അറിയിച്ചു. അധിനിവേശ വെസ്റ്റ് ബാങ്കിലെ കുടിയേറ്റക്കാരുടെ ആക്രമണം ഉടന്‍ അവസാനിപ്പിക്കണമെന്നും അദ്ദേഹം ആവശ്യപ്പെട്ടു.
ഇസ്രായേലിനെതിരായ ഹമാസിന്റെ ക്രൂരമായ ആക്രമണത്തെ പ്രസിഡന്റ് ബൈഡന്‍ അപലപിക്കുകയും ഫലസ്തീന്‍ ജനതയുടെ അന്തസ്സിനും സ്വയം നിര്‍ണ്ണയാവകാശത്തിനുമായി ഹമാസ് നിലകൊള്ളുന്നില്ലെന്നും ആവര്‍ത്തികുകയും ചെയ്തു
എല്ലാ സിവിലിയന്മാര്‍ക്കും വെള്ളം, ഭക്ഷണം, വൈദ്യസഹായം എന്നിവ ലഭ്യമാക്കുന്നതിന് ഐക്യരാഷ്ട്രസഭ, ഈജിപ്ത്, ജോര്‍ദാന്‍, മേഖലയിലെ മറ്റ് രാജ്യങ്ങള്‍ എന്നിവയുമായി ഏകോപിപ്പിക്കുന്നതിനെക്കുറിച്ച് പ്രസിഡന്റ് ഇരു നേതാക്കളുമായും സംസാരിച്ചു.
രണ്ട് കോളുകളിലും, സംഘര്‍ഷം വര്ധിക്കുന്നത് തടയേണ്ടതിന്റെ ആവശ്യകത ബൈഡന്‍ ഊന്നിപ്പറഞ്ഞു, ഹമാസിനെ പിന്തുണച്ച ഇറാന്‍ പോലുള്ള മറ്റ് കക്ഷികള്‍ അല്ലെങ്കില്‍ ഇറാന്റെ പിന്തുണയുള്ള ലെബനീസ് തീവ്രവാദി ഗ്രൂപ്പായ ഹിസ്ബുള്ള യുദ്ധത്തിലേക്ക് ചാടിയേക്കുമെന്ന വ്യാപകമായ ആശങ്ക പ്രതിഫലിപ്പിക്കുന്നു.
