മണിപ്പൂരില്‍ രാഷ്ട്രപതി ഭരണം ഏര്‍പ്പെടുത്തി
ന്യൂഡല്‍ഹി: ദിവസങ്ങളായി നീണ്ട അനിശ്ചിതത്വത്തിനൊടുവില്‍ കേന്ദ്ര സര്‍ക്കാര്‍ മണിപ്പൂരില്‍ രാഷ്ട്രപതി ഭരണം ഏര്‍പ്പെടുത്തി. എന്‍. ബിരേന്‍ സിങ് മുഖ്യമന്ത്രി സ്ഥാനം രാജിവെച്ചതിന് ശേഷം പുതിയ മുഖ്യമന്ത്രിയെ കണ്ടെത്താന്‍ ബിജെപിക്ക് കഴിയാത്തതിനെ തുടര്‍ന്നാണ് ഈ തീരുമാനം. ബിരേന്‍ സിങ്ങിന്റെ പിന്‍ഗാമിയെ തീരുമാനിക്കാന്‍ ബിജെപി കേന്ദ്ര നേതൃത്വം ശ്രമിച്ചെങ്കിലും ഫലം കണ്ടില്ല.
2023 മെയ് മാസത്തില്‍ ആരംഭിച്ച വംശീയ കലാപത്തിന്റെ പശ്ചാത്തലത്തിലാണ് ബിരേന്‍ സിങ് രാജിവെക്കേണ്ടി വന്നത്. സംസ്ഥാനത്തെ പ്രബല സമുദായങ്ങളായ മെയ്തി, കുക്കി വിഭാഗങ്ങള്‍ തമ്മിലുള്ള സംഘര്‍ഷം രണ്ട് വര്‍ഷം പിന്നിടുമ്പോഴാണ് ബിജെപി നേതൃനിലവാരം അദ്ദേഹത്തിന്റെ രാജി ആവശ്യപ്പെട്ടത്.
കഴിഞ്ഞ നവംബറില്‍ സഖ്യകക്ഷിയായ കോണ്‍റാഡ് സാങ്മയുടെ നേതൃത്വത്തിലുള്ള നാഷണല്‍ പീപ്പിള്‍സ് പാര്‍ട്ടി (NPP) ബിരേന്‍ സിംഗ് സര്‍ക്കാരിനുള്ള പിന്തുണ പിന്‍വലിച്ചിരുന്നു.
ഫെബ്രുവരി 9-ന് ആഭ്യന്തര മന്ത്രി അമിത് ഷാ, ബിജെപി ദേശീയാധ്യക്ഷന്‍ ജെ.പി. നദ്ദ എന്നിവരുമായി ബിരേന്‍ സിങ് കൂടിക്കാഴ്ച നടത്തിയിരുന്നു. ഇതിന്റെ പിന്നാലെയാണ് അദ്ദേഹം രാജിവെച്ചത്.
മുന്‍പ് കുക്കി വിഭാഗം മണിപ്പൂരില്‍ രാഷ്ട്രപതി ഭരണം ആവശ്യപ്പെട്ടിരുന്നു. സംസ്ഥാനത്ത് സമാധാനസ്ഥിതി പുനസ്ഥാപിക്കാന്‍ ഇതു വേണ്ടിയിരിക്കുമെന്നായിരുന്നു അവരുടെ വാദം. കോണ്‍ഗ്രസ് ഉള്‍പ്പെടെയുള്ള പ്രതിപക്ഷ പാര്‍ട്ടികളും ഇതേ ആവശ്യമുന്നയിച്ചിരുന്നു.
