കാനഡയില്‍ റണ്‍വേയില്‍ യാത്രാവിമാനം തലകീഴായി മറിഞ്ഞു; യാത്രക്കാര്‍ക്ക് അദ്ഭുതകര രക്ഷപ്പെടല്‍
ഒട്ടാവ: കാനഡയില്‍ ടൊറന്റോ വിമാനത്താവളത്തില്‍ ലാന്‍ഡ് ചെയ്യുന്നതിനിടെ വിമാനം അപകടത്തില്‍പ്പെട്ടു. വിമാനം തലകീഴായി മറിയുകയായിരുന്നു. 76 യാത്രക്കാരും 4 വിമാന ജീവനക്കാരും അടക്കം 80 പേരാണ് വിമാനത്തിലുണ്ടായിരുന്നത്. അപകടത്തില്‍ 18 പേര്‍ക്ക് പരുക്കേറ്റു. ഇതില്‍ മൂന്നുപേരുടെ നില ഗുരുതരമാണ്.
യുഎസിലെ മിനിയപ്പലിസില്‍നിന്നു ടൊറന്റോയിലെത്തിയ ഡെല്‍റ്റ 4819 വിമാനമാണ് അപകടത്തില്‍പ്പെട്ടത്. വിമാനം ലാന്‍ഡ് ചെയ്യുന്നതിനിടെ ഉണ്ടായ കനത്ത കാറ്റിനെ തുടര്‍ന്ന് അപകടമുണ്ടായതെന്നാണ് പ്രാഥമിക നിഗമനം. മഞ്ഞുവീഴ്ചയെ തുടര്‍ന്ന് വിമാനത്താവളത്തിലെ കാഴ്ച പരിധിയും കുറവായിരുന്നു. റണ്‍വേയും മഞ്ഞുമൂടിയ നിലയിലായിരുന്നു.
ലാന്‍ഡ് ചെയ്യാന്‍ ശ്രമിക്കുന്നതിനിടെ വിമാനം നിയന്ത്രണം വിട്ട് റണ്‍വേയില്‍ തലകീഴായി മറിയുന്നതിന്റെ ദൃശ്യങ്ങള്‍ പുറത്തുവന്നിട്ടുണ്ട്. അപകടം നടന്ന ഉടന്‍ തന്നെ സുരക്ഷാ ഉദ്യോഗസ്ഥര്‍ വിമാനത്തിലുണ്ടായിരുന്നവരെയെല്ലാം പുറത്തെത്തിച്ചു. ഹെലികോപ്റ്ററും ആംബുലന്‍സുകളും ഉപയോഗിച്ചാണ് പരുക്കേറ്റവരെ ആശുപത്രിയില്‍ എത്തിച്ചത്. പരുക്കേറ്റ 60 വയസുകാരന്റെയും 40 വയസുള്ള സ്ത്രീയുടെയും ഒരു കുട്ടിയുടെയും ആരോഗ്യനിലയാണ് ഗുരുതരമായി തുടരുന്നതെന്ന് രാജ്യാന്തര മാധ്യമങ്ങള്‍ റിപ്പോര്‍ട്ട് ചെയ്യുന്നു.